ಪರರ ನೋವಿನಲಿ ಖುಷಿ ಪಡುವ ಮೂರ್ಖರೆಷ್ಟೋ
ತಾವೇ ಬಳಲಿದರೆ ಅರಿಯುವುದು ಉರಿಯೆಷ್ಟು!

ತಾನು ತನ್ನವರೆಂದು ಕೋಟೆ ಹಾಕುವುದೇಕೆ
ಶುದ್ಧ ಮನ ಸಮರಸವೇ ಸುಖ ಸೌಖ್ಯದ ಸ್ವಾರಸ್ಯ

ಇರುವುದೊಂದು ಜನ್ಮ ನಾಲ್ಕು ದಿನದ ಪಯಣ
ಕೂಡಿ ಬಾಳುವ ಮರ್ಮ ಕಲಿಯ ಬಾರದೇಕೆ?


-

ಪುಟ್ಟು ಕಂದಮ್ಮ

ನೀ ಅತ್ತರೆ ನಾ ಅಳುವೆ
ನೀ ನಕ್ಕರೆ ನಾ ನಗುವೆ
ನಿನ್ನೊಡನೆ ನಾನಿರಲು
ಜಗವನ್ನೇ ನಾ ಮರೆವೆ ||

ಅಕ್ಕರೆಯ ಮುದ್ದು ನಗು
ಸವಿ ಜೇನ ಹನಿಯಂತೆ
ಪುಟ್ಟ ಕಾಲ್ಗಳ ಗೆಜ್ಜೆ ದನಿ
ಇಂಪು ನಾದದ ಲಹರಿ ||

ನಾ ಬರುವುದ ನೀ ಕಾಯುವೆ
ನಿನ್ನ ಅಪ್ಪುಗೆ ಕೆಂದಾವರೆ
ನಿನ್ನ ಪ್ರೀತಿಯ ಕಣ ಕಣವೂ
ನನ್ನ ಬಾಳಿಗೆ ಮಹದಾಸರೆ ||