ಪರರ ನೋವಿನಲಿ ಖುಷಿ ಪಡುವ ಮೂರ್ಖರೆಷ್ಟೋ
ತಾವೇ ಬಳಲಿದರೆ ಅರಿಯುವುದು ಉರಿಯೆಷ್ಟು!

ತಾನು ತನ್ನವರೆಂದು ಕೋಟೆ ಹಾಕುವುದೇಕೆ
ಶುದ್ಧ ಮನ ಸಮರಸವೇ ಸುಖ ಸೌಖ್ಯದ ಸ್ವಾರಸ್ಯ

ಇರುವುದೊಂದು ಜನ್ಮ ನಾಲ್ಕು ದಿನದ ಪಯಣ
ಕೂಡಿ ಬಾಳುವ ಮರ್ಮ ಕಲಿಯ ಬಾರದೇಕೆ?


-

ಪುಟ್ಟು ಕಂದಮ್ಮ

ನೀ ಅತ್ತರೆ ನಾ ಅಳುವೆ
ನೀ ನಕ್ಕರೆ ನಾ ನಗುವೆ
ನಿನ್ನೊಡನೆ ನಾನಿರಲು
ಜಗವನ್ನೇ ನಾ ಮರೆವೆ ||

ಅಕ್ಕರೆಯ ಮುದ್ದು ನಗು
ಸವಿ ಜೇನ ಹನಿಯಂತೆ
ಪುಟ್ಟ ಕಾಲ್ಗಳ ಗೆಜ್ಜೆ ದನಿ
ಇಂಪು ನಾದದ ಲಹರಿ ||

ನಾ ಬರುವುದ ನೀ ಕಾಯುವೆ
ನಿನ್ನ ಅಪ್ಪುಗೆ ಕೆಂದಾವರೆ
ನಿನ್ನ ಪ್ರೀತಿಯ ಕಣ ಕಣವೂ
ನನ್ನ ಬಾಳಿಗೆ ಮಹದಾಸರೆ ||

ಆಶಾವಾದಿಯ ಗುನುಗು !

ಒಳಗೊಂದು ಹೊರಗೊಂದು ನನಗಿರಲು ಬಾರದು
ತಳಮಳದ ಇರಿತವನು ಸಹಿಸಲೂ ಆಗದು
ಮನಸು ಹುಚ್ಚು ಕುದುರೆ ಕನಸ ಕಾಣದು ಬಿಡದು
ನನಗಾರು ಹಿತವರು ಪುಟ್ಟು ಮನಸನ್ನ ಅರಿವವರು?

ಪ್ರೀತಿ ತೋರುವ ಮನಸು ಪ್ರೀತಿ ಬಯಸುದು ತಪ್ಪೇ?
ಮತ್ತೆ ಬಾರದು ಜಗದಿ ಕಳೆದು ಹೋಗಿಹ ಸಮಯ
ಕ್ಷಣದ ಖುಷಿ ಸಾಕೆನಗೆ ಮುಗುಳು ನಗೆ ತುಟಿ ಮೇಲೆ
ಮತ್ತೆ ಬರಲಿದೆ ವಸಂತ ಇಂದಲ್ಲ ನಾಳೆ ...